Kamis, 16 Februari 2012

Baaluah...........

PASAMBAHAN MINUM jo MAKAN Sipangka : Oo sutan….!!!!! Alek I : Iyoo ambo. Sipangka : Sungguah pun sutan surang nan taimbau dek ambo kini, sarapek papeknyo niniak jo mamak, guru jo rajo, sanak jo sudaro, nan di tani lantai, nan lingka dindiang, nan di sungkuik atok. Rasian pamenan lalok,kacimpuang pamenan mandi. Artinyo bana; indak tabilang indak ta atok, A nan kapambilang nan ka ma atok?? Salam jo sambah di tibokan bakeh sutan. Alek I : Manitah lah….!!! Sipangka : kini alah sambah di tibokan bakeh sutan? iyolah awa dibari bapamula an, akhie nan di bari bakasudahan, ba a dek awa nyo? Iyo lah dek iyo-iyo baradi, dek tido-tido barako, lah dicari hari nan baik kutiko nan elok, dek hari sahari tadi, dek malam samalam nangko, antah ko hari nan baiak, antah ko kutiko nan elok, sadang wakatu bungo kambang, sauoh tatagak angin tibo, anjuong balayia di musimnyo, sadang ko elok palayaran, ba a dek kamujuran kami silang nan bapangka, karajo nan bapokok, kok pandang jauah di laying kan, pandang dakek di tukiak kan, artinyo bana; jauah dilayag kan surek, dakek di kapuakan siriah, ruponyo jikok jauh lah cinto-mancintojikok dekek suruah lah dating, A pikolah untuak dek kami silang nan bapangka karajo nan bapokok? Iyolah manjago taratik jo majlih, karenah lelo jo sopan, artinyo bana; imbau di laman lah basahuti, jikok naiak alah di singkok kan pintu, jikok duduak alah di kambang kan lapiak, ruponyo kok dicaliak lah baiak rupo, kok di makan lah baiak raso, dek karano duduak alah bareda, tagak alah bapusu, A pulo lah untuak dek kami silang nan bapangka karajo nan bapokok, iyolah nak manjago ereng jo gendeang, cakah dengan kaik, artinyo bana; cewang di langik tando kapaneh, gabak di hulu tando ka hujan, artinyo bana; tibo katiko paneh nak di sadiokan palindungan, tibo katiko hujan nak di sadiokan payuang, artinyo bana; tibo wakotu minun di sadiokan aia saroto jo paminumnyo, tibo wakotu makan di sadiokan nasi saroto jo pamakannyo, ba a nan sawajah iko kini, lah tibo di wakotu awih lah di sadiokan aia saroto jo paminunnyo, lah disuruah sutan sirajo janang nan capek kaki, nan ringan tangan untuak maetak maetengkan hidangan kahadapan kito nan basamo, pihak kapado sutan sirajo janang, urang nan arih bijaksano, tahu dikilek dengan kalam, tahu di bayang kato sampai, alun di suruah inyo lah pai, alun di imbau inyo lah dating, pandai ma etak janang dahulu, pandai manyusun janang kudian, dari pangka lapeh ka ujuang, dari tangah lapeh ka tapi, indak balago cawan jo pinggan, sanang lah hati ma mandangnyo, ruponyo nan kajadi kandak dek kami silang nan bapangka karajo na bapokok, aia talatak mintak diminum, hidangan katangah mintak di makan. Sakian lah sambah ka bakeh sutan, senteng mintak di bilai kurang mintak di tukuak. Jawaban alek I : alah sampai dek sutan….. Sipangkalan : Bilang alah. Alek I : Ruponyo buah kabanaran sutan tu, lah di dalam barih jo balabeh,alah dilingkuang adat jo pusako, adat lamo pusako usang, jalan rayo titian batu, Itulah kato nan sabananyo,sabuah indak nan salah, sasabuik ka sadonyo, Ba a dek ambo tu kini, sahandaknyo kaki tarejang sambuik tibo, artinyo bana Kato lakeh bajawek, gayuang lakeh basambuik, ba adek ambo tu kini, Sabalum kato ka di jawek, sabalum gayuang ka di sambuik, dek karano duduak baganding jo nan pandai, tagak baganding jo nan tuo, jikok ambo ambo ambiak rundiang jo baiyo, jikok ambo renjeng kato jo mufakat, sifat mananti sutan sakutiko, lai ko dalam barih jo balabeh, lai ko dilingkuang adat jo pusako, senteang mintak di bilai kurang mintak di tukuak. salam kumbali bakeh sutan.. Sipangka : Alah sampai dek Sutan…. Alek I : Bilang alah Sipangka : Ruponyo kabanaran sutan tu kini, di tiliak lah maklum kato, di paham lah maklum sambah, kok alua lah tibo di nan patuik, kato lah tibo di nan bana, dek duduak lai bagandiang jo nan pandai,tagak bagandiang jo nan tuo, artinyo bana, nak di ambiak rundiang jo baiyo, direnjeang kato jo mufakat, sifat mananti sutan sakutiko kan baitu bana kato sutan???? Pihak nyo sambah dek ambo tu kini, indak pulo di uji samo merah, indak pulo ditimbang samo baarek, ba a dek ambotu kini, nan marusuah nan manggamang kato surang kok indak di bulati, kato basamo kok indak di paiyokan, kok nan tuo indak di pamulie, kok nan ketek indak di kasihi, samo gadang indak di baok jo baiyo, ruponyo dek sutan urang arih bijaksano urang nan gadang cando kio, tau di kilek dengan kalam, tau di bayang kato sampai, artinyo bana. Suri nan tagantuang lai kabatanun, jalan tarantang lai ka batampuah, adat babuek lai ka bapakai, indak do sutan, pucuak dicinto bulan pun tibo,sumua dikali aie datang,cincin di cinto galang buliah, ba a dek ambo tu kini, sahingo mintak lai ka buliah mintak lai kabalaku, lambek jo lamo ambo nati sutan, tapi jan lamo bana. Alek I : alah sampai sutan??? Sipangka : bilang alah Alek I : Indak do sutan, sahinggo lah dapek izin nan sabuah, kato nan sapatah, pandai baturuk, kato badanga, kato dapek bapakai sutan. Sipangka : insya allah mandanga bunyi. MAMPALEGAKAN KATO Dari alek I ka si alek II Alek I : ooo sutan!!!!!!!!!!!!!!!! Alek II : Iyo Ambo. Alek I : Sungguah pun sutan surang nan ta imbau dek ambo tu kini, iyolah sarapeknyo niniak jo mamak, guru jo rajo, sanak jo sudaro, nan di tani lantai, nan di lingkuang dindiang, nan di sungkuik atok, rasian pamenan lalok, kacimpuang pamenan mandi, indak ta bilang indak ta atok, hanyo nan kamambilang nan ka ma atok, ka banaran di tibokan bakeh sutan. Alek II : Manitahlah atau palaluan lah mak. Alek I : Aa lah nan ka jadi buah kabanaran dek ambo tu kini, iyo basuo juo bak pitua urang tuo, di pancuang talang ka turak di ambiak ka junjuang siriah, malang ndak dapek ambo tulak, mujua ndak dapek di raiah, ba a dek kamujurannyo, lah talatak hidangan kahadapan kito nan basamo, dek dek kamalangannyo lah tibo panitahan dek silang nan bapangka, karajo nan bapokok, tatukiek ka bakeh ambo, talayangnyo ka bakeh kito nan basamo, ba a dek ambo tu kini, takuik di badan nan kabarutang, cameh di badan nan ka mati, kok kato alun ambo jawab, kok gayuang alun ambo sambuik, dek dek karano sutan lai duduak disiko, supayo nak ka hilia sarangkuah dayuang, ka mudiak satulak galah, ba a dek ambo tu kini, babulekkan aie ka pambuluah, di bulekkan kato ka mufakat, di bulekkan jantuang ka kalupak, Iyo sutan bana nak mangumbalikan dima tabiknyo nan bak padi, dima tumbuahnyo nan bak bijo, sakian sambah ka bakeh sutan, senteang mintak di bilai kurang mintak di tukuak. Jawab alek II Alek II : Alah sampai dek sutan. Alek I : Bilang Alah. Alek II : Ruponyo buah ka banaran sutan tu alah di dalam barih jo balabeh, dilingkuang adat jo pusako, adat lamo pusako usang, jalan rayo titian batu Itulah kato sabananyo, sabuah indak nan ba salah, tasabuik iyo kasadonyo, ba a dek ambo tu kini, sahandaknyo sahimbau sampai, salangkah tibo, artinyo bana, kato lakeh bajawek, gayuang lakeh basambuik, pidato lai ambo imak, ba a dek ambo tu kini, sabalum kato ka ambo jawek ,sabalum gayuang ka ambo sambuik, karano ka ateh lai dapek di paningadahkan, kabawah lai dapek di takuakan, ka suok lai dapek ma engoh, ka kida lai dapek ma ereng, artinyo bana, karano lai duduak niniak jo mamak, guru jo rajo, sanak jo sudaro,nak ambo ambiak rundiang jo baiyo, nak ambo renjeang kato jo mufakat, supayo bajalan nak nyo baranti, bakato nak sudah, sifat mananti sutan sakutiko, lai kodi dalam barih jo balabeh, dilingkuang adat jo pusako. Jawab alek I Alek I : alah sampai dek sutan???? Alek II : Bilang alah Alek I : Ruponyo kabanaran sutan itu kini, di danga lah baik bunyi, di pandang lah baik rupo, kok alua lah tibo di nan patuik, kok kato lah tibo di nan bana, ba a dek sutan tu kini, dek lai duduak niniak jo mamak, guru jo rajo, sanak sudaro, nak di ambiak rundiang jo baiyo, nak di renjeang kato jo mufakat, sifat mananti ambo sakutiko kan baitu bana kato sutan? Indak do sutan, dek ambo tu kini, indak pulo di uji samo merah, indak pulo di timbang samo barek, ba a dek ambo tu kini, nan marusuah manggamang nan tuo kok indak di pamulie, kok nan ketek indak di kasihi, nan samo gadang kok indak di lawan ba iyo, ruponyo dek sutan urang nan arih bijak sano, urang nan cadiak cando kio, tau di kilek dengan kalam, tau di bayang kato sampai, artinyo bana, suri tagantuang lai ka batanun, jalan tarantang lai ka batampuah, Indak do sutan, sahinggo nan ka dijuluak lai ka rareh, nan dijapuik lai ka ta baok,asa kandak lai ka balaku, lambek jo lamo ambo mananti sutan. Alek II : Indak do sutan, sahinggo lah dapek izin nan sabuah, kato nan sapatah, pandai baturuik kato badanga, kato dapek bapakai sutan. Alek I : insya allah mandanga bunyi. Mintak Barih jo Balabeh Alek II : Ma Angku Datuak Datuak : Iyo ambo. Alek II : Di susun jari nan sapuluah, di takuakan kapalo na satu, di unjuakan lutuik nan duo bakehnyo ambo mintak ampun, sungguah pun datuak surang nan taimbau dek ambo tu kini, iyolah sarapeknyo niniak jo mamak, guru jo rajo, sanak jo sudaro, nan di tani lantai, di lingka dindiang, di sungkuik atok, indak ta bilang indak ta atok, angku datuaklah ambo jalang jo pasambahan. Datuak : manitahlah. Alek II : Kini alah sambah di tibokan ka bakeh datuak, iyolah awal babari pamulaan akhia nan dibari bakasudahan, kok di awalnya, di pancuang talang katurak, di ambiak ka junjuang sirieh, malang tak dapek ditulak maujua tak dapek di raiah, dek kamujurannyo, lah talatak hidangan kahadapan kito nan basamo, dek kamlangan nyo lah tibo panithan dari silang nan bapangka, karajo nan ba pokok, tatukiak ka bakeh sutan I (………….) talayang ka bakeh kito nan basamo, lah tibo pulo ka bakeh ambo, ba a dek ambo tu kini kato alun ambo jawek, gayuang alun ambo sambuaik, pidato alah ambo imak, dek karano lai duduak datuak disiko, iyo nak babari barih jo balabeh Ukua jo jangko, supayo bajalan nak nyo baranti, bakato nak nyo sudah, sakian sambah ka bakeh angku datuak, senteang mintak di bilai, kurang kurang mintak di tukuak. Datuak : oo sutan!!!!!!! Alek II : iyo ambo Datuak : Sungguah punsutan surang nan taimbau dek ambo tu kini, iyolah sarapek papeknyo niniak jo mamak, guru jo rajo sanak jo sudaro, nan di tani lantai, di lingka dindiang di sungkuik atok, artinyo bana indak tabillang indak ta atok, hanyo nan ka mambilang nan ka ma taok, ujuang kabaran sutan di panaiak, A lah nan jadi buah kabanaran dek sutan tu tadi, iyolah dek awa nan bapamulaan, dek akhia nan bakasudahan, ba a dek awalnyo, iyolah dek alah manitah silang nan bapangka, karajo nan ba pokok, nan ta tukiak ka bakeh sutan I (……………..) talayang ka bakeh kito nan basamo, mah lah tibo pulo ka bakeh sutan, ba a dek sutan tu kini, gayuang balun basambuik, kato balum bajawek, dek lai duduak pulo ambo di siko, nak babari barih jo ba labeh, ukua jo jangko, supayo bajalan nak nyo baranti bakato naknyo sudah kan baitu bana kato sutan? Ba a dek ambo tu kini kasuok lah ambo engohkan, ka kida lah ambo erengkan, ba a tunyo kini, babulekkan aia ka pambuluah, babulekkan jantuang ka kalupak, pulangkan dek sutan dima tabiknyo bak padi, dima tumbuah nan bak bijo, ateh namo pintak dek silang nan bapangka karajo nan bapokok, pintak samo-samo kito bari, kandak samo-samo kito palakuan, dalam itu kito nan basamo, singkek sajo sutan. Alek II : Alah sampai dek Datuak???? Datuak : Bilang alah Alek II : Sapanjang buah kabanaran angku datuak tu kini, di danga alah baik bunyi, di pandang lah baik rupo, alah di lingkuang adat jo pusako,adat lamo pusako usang, jalan rayo titian batu, itulah kato nan sabananyo, ba a dek ambo kini, indak pulo ka di ulang kili di titikam jajak, di ulang kili kok nyo lapeh, kok di tikam jajak koknyo mati, ba a nyo tu kini senteang lah rasoba babilai, kurang lah raso batukuak, buruak lah ba paelok, elok lah ba hiasi, ba a nyo tu kini, nak ambo pulangkan dima tabiknyo nan bak padi tumbuah nan bak bijo, sungguah mantang pun baitu, duduak bapaio tagak babimbiang, singkek sajo angku datuak. Datuak : insya allah mandanga bunyi. Alek II : ma sutan? Alek I : iyo ambo…. Alek II : sungguah pun sutan surang nan ta imbau dek ambo tu kini, iyolah Sarapeknyo niniak jo mamak, guru jo rajo sanak jo sudaro, nan di tani Lantai, di lingka dindiang, di sungkuik atok, artinyo bana, indak tabilang Indak ta atok, hanyo nan ka mambilang nan ka ma atok, ujuang kabanaran Sutan di panaiak. Alah nan jadi buah kabaran dek sutan tu tadi, iyolah di pancuang talang Katurak, di ambiak ka junjuang siriah, malang tak dapek di tulak, mujua tak Dapek diraiah, ba a dek ka mujurannyo, lah talatak hidangan ka hadapan Kito nan basamo, dek kamalangannyo, lah tibo panitahan dari silang nan Bapangka karajo nan bapokok. Tatukiaknyo ka bakeh sutan talayangnyo ka Kabakeh kito nan basamo, ba a dek sutan tu kini, cameh di badan nan ka Ba hutang, takuik di badan nan ka mati, kok gayuang alun ba sambuik Gayuang alun ba sambuik, katoalun bajawek, karano lai duduak pulo ambo Di siko, supayo kailia nak sarangkuah dayuang, ka mudiak satulak galah, Nak ambo bana mangumbalikan dima tabiknyo nan bak padi,tumbuah nan Bak bijo, kan baitu bana kato sutan. Indak do sutan, ba a dek ambotu kini, kasuok alah ambo engohkan ka kida Alah ambo erengkan, ba a nyo tu kini, babulekkan aia ka pambuluah, Babulekkan jantuang ka kalupak, tantangan gayuang nan kamanyambuik Kato nan ka bajawab, iyo sutan bana nan mangumbalikan dima tabik nan Bak padi, dima tumbuah nan bak bijo, ateh namo dek pintak dek silang nan bapangka,karajo nan bapokok, pintak samo-samo kito bari,kandak samo-samo kito palakuan, didalam itu kito nan basam, singkek jo sutan. Alek I : Alah sampai dek sutan? Alek II : Bilang alah. Alek I : Sapanjang buah kabanaran sutan itu kini ditiliak alah maklum kato, di paham maklum sambah, kok alua alah tibo di nan patuik, kato alah tibo di nan bana, ba a dek ambo tu kini, indak pulo di ulang kili ditikam jajak, di ulang kili banang kok lapeh, ditkam jajak kok sipih, ba a tunyo kini, senteang lah raso babilai, kurang lah raso batukuak, buruak lah ba pa elok, elok lah bahiasi, ba a tunyo kini, sahinggo lah dapek kato sabuah, ambo kumbalikan dima tabiknyo nan bak padi, tumbuahnyo nan bak bijo, duduak ba paluak tagak babimbiang sutan. Alek II : insya allah mandanga bunyi. Alek I : ma sutan? Sipangka : iyo ambo. Alek I : sungguah sutan surang nan taimbau dek ambo tu kini, iyolah sarapeknyo niniak jo mamak guru jo rajo,sanak jo sudaro, nan ditani lantai, nan di lingka dindiang, nan di sungkuik atok, artinyo bana rasian pamenan lalok, kacimpuang pamenan mandi, indak tabilang indak ta atok, hanyo nan ka mambilang nan ka ma atok, kabanaran sutan di panaik. Sipangka : Manitahlah Alek I : A lah nan jadi buah kabanaran dek tu tadi, iyolah awal di bari ba pamuloan akhie di bari bakasudahan, ba a dek awalnyo iyolah dek iyo-iyo baradi dek tido- tido barako, lah dicari hari nan baiak kutiko nan elok, dek hari sahari tadi, dek malam samalam nangko, antah ko hari nan baik antah ko kutitiko nan elok,sadang wakatu bungo kambang, sauoh tatagak angin tibo, ajuong balaia di musimnyo, sadangko elok palayaran, ba a dek kamujuran dari silang nan bapangka, karajo nan bapokok, kok pandang jauah lah di layangkan pandang dakek lah di tukiakkan, artinyo bana tu kini, jauah lah di layangkan surek, dakek lah di kapuakan siriah, ruponyo jikok jauh alah cinto mancitoi, jikok dakek saruan alah datang. A pulo lah untuang dek kami dari silang nan bapangka karajo nan bapokok, iyolah manjago taratik jo majlih, karenah lelo jo tampan, artinyo bana imbau di laman alah basahuti, jikok naiak alah disingkok kan pintu, jikok dudak alah di kambangkan lapiak, ruponyo kok di caliak alah baik rupo, di makan alah baik raso, karano duduak alah bareda, duduak alah bapusu, tantu nak bajago pulo ereang jo gendeang, cakah dengan kaik, artinyo bana cewang di langik cando ka paneh, gabak di hulu cando ka hujan, artinyo bana, tibo di jangko wakatu ka minum lah di di sadiokan aia sarato jo paminumnyo, tibo di jangko wakatu ka makan lah di sadiokan nasi sarato jo pamakannyo, nan lah disuruah sutan sirajo janang nan capek kaki baringan tangan, untuak ma etak ma eteangkan hidangan ka hadapan kito nan basamo, pihak kapado sutan sirajo janang urang nan arih bijaksano, tau di kilek dengan kalam, tau di bayang kato sampai, alun disuruah inyo lah pai, alun di imbau inyo lah datang, pandai maotok janang dahulu, pandai manyusun janang kudian, dari pangka lapeh ka ujuang, dari tangah lapeh katapi, indak balago cawan dengan pinggan, sananglah hati mandanganyo, ruponyo nan jadi kandak dek silang nan bapangka karajo nan bapokok, aia taisi mintak di minum hidangan ka tangah mintak di santap, kan baitu bana kato sutan? Indak do sutan sapanjang buni kabanaran sutan tu tadi, dek ambo tu kini kato surang lah ambo pa bulek I, kato basamo alah ambo pa iyokan, artinyo bana, tingginyo bukik alah ambo daki, dalamnyo lurah lah ambo turuni, ka ilia alah ambo rantang tali, ka mudiak alah ambo serakkan jalo, dek mancari bulek nan sagolang picak nan salayang, ba a tu nyo kini kok bulek lah buliah di golongkan, picak alah buliah di layangkan, ba a tu nyo kini nan ka jawabnyo, dek baliau nan basamo, sahinggo lah sakah dari dahan, lah gugua dari pado tampuak, kasiah batarimo titah bajunjuang, salam kumbali pado sutan. Sipangka : alah sampai dek sutan? Alek I : bilang alah. Sipangka : sapanjang buah kabanaran sutan tu kini di danga lah baiak buni, di pandang lah baiak rupo, ba a dek ambo tu kini indak di baliak nan bak mamanggang, indak di ulang nan bak manyapuah, itu juo nan ka disabuik, ba a tunyo kini sentenglah lah raso babilai, kurang lah raso batukuak, buruak lah ba pa elok, elok lah ba hiasi, ba a tu nyo kini, ba uruikkan ka muko, ba urehkan ka hati, ba mulai dengan bismillah sutan.

Pengikut